لا نريد اسقاط الحكومة، لا نريد حل المجلس التاسيسي، نريد اسقاط النظام!!

"الشعب يريد اسقاط النظام" شعار رفعناه وقت الثورة، رفعناه وقت القصبة و مازلنا رافعينوا حتى اليوم.

قالولنا علاش؟ تحبوا تطيحوا الحكومة و المجلس التاسيسي خاتر مش عاجبتكم نتائج الانتخبات؟

نحنا نقولو لا و الف لا ! طالبنا بالمجلس التاسيسي و بالانتخبات و متمسكين بيهم و بشرعيتهم اما متمسكين زادا بالشرعية الثورية، يعني باهداف الثورة.

النظام اللي نحبوا نطيحوه تبنى من وقت بورقيبة على دولة البوليس، على عدم الفصل بين الحزب و الدولة، التونسي ما كانش يعتبروه مواطن، كمشة مالناس يختاروا في بلاصتو شكون يحكمه، كيفاش يحكمه و كيفاش يقمعه، زيد على هذا خيارات اقتصادية تبعية شقت البلاد في ثنين و خلات شطرها في الميزيريا. بن علي كي جاء، زاد الفساد و المحسوبية و ردها بلاد يحكموا فيها الباندية، و بقية النظام ما تبدلش

رأس النظام هرب و البدن مازال هوني

نطالبوا بالقطع الجذري مع النظام السابق، نطالبوا باسقاطه و نطالبوا الحكومة و المجلس التاسيسي بش ما ينساوش اللي شرعيتهم جايا من الثورة و اللي لازمهم يكونوا اول من يساندنا في مطالبنا في عوض ما يخافوا منا. يختزلوا مفهوم الدولة في الحكومة، ياخي ما يفهموش اللي الدولة اوسع ببرشا مالحكومة؟ فيها الحكومة و البرلمان، صحيح، اما فيها زادا المعارضة و المجتمع المدني و القضاء و الاعلام... يحبوا ياخذوا السلطة، ، يبدلوا طرف صغير مل الخماج، يخلّيوا طرف آخر و يرقعوا بشويا عباد نظاف، ما غير ما يبدلوا النظام القديم و يردوه يتجاوب مع نَفَس الثورة و ما غير ما يبدلوا علاقة السلطة بالتونسي اللي حارق روحو بش يولي مواطن. يحبوا يبدلوا رأس برأس آخر و ينساوا اللي مسار الثورة الحقاني هو تحطيم النظام الاستبدادي و بناء نظام جمهوري ديمقراطي تشاركي.فما برشا عباد تحب تقسم التونسيين ما بين إسلاميين و علمانيين، و يسخايلونا سيدي تاتا ما نفهموش اللي ها الدمغجة الفارغة مجعولة بش تنسّينا اللي الانقسام الحقيقي هو اللي يفصل ما بين اللي يحبوا يحققوا أهداف الثورة و يكسروا النظام السابق و ما بين اللي يحبوا يخليوه كيفما هو و ما يبدلوا كان الوجوه في وسطه. الانقسام هذا موجود عند الإسلاميين و عند العلمانيين، جاء الوقت باش تتوضح الأمور و المواقف و طاح الكف على ضله.

 ما ننساوش اللي عطا النفيس و الغالي، حياتو و صحتو، و ولى شهيد او من جرحى الثورة بش نوليوا ناس احرار و نكملوا المشوار بش نكسبوا كرامتنا ومواطنتنا. هذا علاش نطالبوا باسقاط دولة البوليس، نطالبوا بالمحاسبة فلا مصالحة قبل المحاسبة، نطالبوا بعدالة انتقالية جدية مش تسمسير و تعويضات مالية، نطالبوا بش السيادة و القرار يرجعوا للمجلس التاسيسي و المجتمع المدني حتى تكون الحكومة اقوى وو تتجاوب مش كان مع المجلس الوطني بل مع كلّ فصائل الشعب، نطالبوا بتنظيف مؤسسات الدولة مل الفساد مع تنويع الالوان السياسية و مغير موالاة حزبية..

هذا المعنى الحقيقي لاسقاط النظام و للشعار الثوري "شغل، حرية، كرامة وطنية"

Khansa Ben Tarjem

Image:Karim Mejdoub