جانى نهار يا تونس، و ريت فيك رجال
خارجة تنادي بحقوق النساء
فرحت وزغردت وقلت
هاو فهمو.. الي حريتهم ما تعني شي ما دامنا مكبلين
هاو فهمو.. الي كرامتهم فانية مادامنا مقموعين
هاو فهمو.. الي الحراك النسوي عمرو ما كان ضدهم
و الي الذكورية فاشية... لا ترحم لا نساء لا رجال
فرحت و قلت ليوم
رجالنا معانا
باش يدافعو على حقنا في الصحة والتعليم و الشغل و الميراث و الجنسية
و باش يناضلو معانا ضد العنف اللفضي والجسدي و المعنوي
وضد التحرش الجنسي والتمييز و التهميش والتفقير
اما طلع خاطيهم
طلع خاطيهم سامحوني
خاطيتهم مشاكلنا
خاطيتهم قضايانا
سامحوني الرجال الي ريتهم في تونس ليوم
خرجو يدافعو على حقنا باش نلبسو النقاب
والا حقهم باش يلبسونا نقاب
الله أعلم...
و تلفتت نلقاهم عاليمين وفطنت اللي انا عليسار و الي ما بيناتنا كياس.. ما هو كياس
و الي في جنبي نساء ورجال لا جات لباردو بمطالب نسوية ولا ضد النقاب
ناس جات تقاوم في الدكتاتورية.. بنساها ، وبرجالها
وريتكم نساء بلادي
الراس عالي والصوت مبحاح
الي بايته في باردو ثلاثة ايام ما رقدتش
والي دفنت ولدها والي قتلو مازال ما تحاسبش
و الي ما بين الخدمة والدار و الصغار و النضال و هي باقي واقفة و ما تعبتش
و عاليمين الكاميراوات تتصيد
تشعلشي وحدة فيكم سيقارو يا نساء بلادي
اتبصشي فيكم وحدة و تتعرا يا نساء بلادي
العينين فيكم تاكل والافام فيكم سكاكن
و الذيوبة فيكم تترصد
و انتوما واقفين... و انا واقفة
وخزرت لرفاقنا
لاصدقائنا
لرجالنا
الي ليوم معانا اليد في اليد
وقلت زعمة يا تونس يجيني نهار
ونشوف فيك رجال
خارجة تنادي بحقوق النساء
رجال فهمو.. الي حريتهم ما تعني شي ما دامنا مكبلين
رجال فهمو.. الي كرامتهم فانية مادامنا مقموعين
و فهمو.. الي الحراك النسوي عمرو ما كان ضدهم
و الي الذكورية فاشية... لا ترحم لا نساء لا رجال
